विद्यालयहरूमा घुम्ती पुस्तकालय ‘बुक बस’

पनौती । पनौती नगरपालिका भित्र रहेका विभिन्न विद्यालयहरुमा घुम्ती पुस्तकालय (बुक बस)को कार्यक्रम सञ्चालन गरिएको छ । अमेरिकी दूतावासको सहयोगमा ‘स्टोरी सेन्टर फर द आर्टस्’द्वारा सञ्चालित बुक बसले पनौतीका विद्यालयमा शैक्षिक तथा सांस्कृतिक कार्यक्रम सुरु गरेको हो ।

गत जेठ ३० गतेदेखि असार ९ गतेसम्म पनौतीका विभिन्न विद्यालयहरुमा घुम्ती पुस्तकालय सञ्चालन गरिनेछ । पनौतीका पाँच विद्यालय र एउटा पुस्तकालयमा विज्ञान, प्रविधि, संरक्षणबारे कार्यशाला तथा पुस्तक पठनपाठनका कार्यक्रम हुने आयोजकले जनाएको छ ।

विद्यार्थीहरुलाई शैक्षिक, सांस्कृतिक तथा नदी र वरिपरिको वातावरणबारे रुचि बढाउन कार्यक्रमको आयोजना गरिएको आयोजकले काभ्रेपोष्टलाई जानकारी दिए ।
गत जेठ ३० र ३१ गते पनौती आधारभूत विद्यालयमा बुक बसको कार्यक्रम सञ्चालन गरिएको थियो ।

त्यस्तै जेठ ३२ र असार १ गते पुण्य हाईस्कुलमा कार्यक्रम सञ्चालन भएको थियो । असार ३ र ४ गते इन्द्रेश्वर माविमा बुक बस कार्यक्रम सञ्चालन हुनेछ भने असार ५ र ६ गते सूर्योदय इङ्लिस बोर्डिङ स्कुल, असार ७ र ८ गते सामुदायिक बोर्डिङ स्कुल र असार ९ गते ज्ञान विकास सामुदायिक पुस्तकालयमा कार्यक्रम तथा प्रदर्शनी हुने आयोजकले जनाएको छ ।

कार्यशाला र कार्यक्रम अन्तर्गत पुस्तक पठन र कथा वाचन, पुस्तकालय प्रदर्शन र स्टीम कार्यशाला हुने आयोजकले जनाएको छ ।