चप्लेटीमा वृक्षारोपण

बनेपा । बनेपा नगरपालिका वडा नं.५ स्थित सेल्फी डाँडा चप्लेटीमा वृक्षारोपण गरिएको छ । बनेपा नगरपालिका वडा नं. ५, काभ्रे जेसीज, बनेपा जुनियर जेसीजको संयुक्त आयोजनामा बृक्षारोपण गरिएको हो । वडा नं. ५ का वडाध्यक्ष वलराम अधिकारीका अनुसार सेल्फीडाँडा चप्लेटी उपभोक्ता समितिको सहयोगमा बृक्षारोपण गरिएको हो ।

सेल्फी डाँडामा वडा र नगरपालिकाको लगानीमा पार्क निर्माण गरिएको छ । उक्त स्थानमा आन्तरिक पर्यटकको भिड लाग्ने र बिहानी आयाम, मर्निङ वाक र युवा युवतीको लागि सेल्फी खिच्नेको घुँइचो लाग्ने गरेको छ । उक्त स्थानलाई वडाको प्रत्यक्ष रेखदेखमा स्थानीय उपभोक्ता समितिले गर्दै आएको वडाध्यक्ष अधिकारीले जानकारी दिए ।

काभ्रे जेसिजका अध्यक्ष रिकेस सैजूले जेसिजले विभिन्न सामाजिक कामहरु गर्दै आएका बताए । काभ्रे जेसिजले बनेपा नगरपालिका वडा नं.५ वडा कार्यलयसँग समन्वय गरि उक्त स्थानमा बृक्षारोपण गरिएको बताए ।

काभ्रे जेसिजले उक्त स्थानमा विभिन्न परिजातका ५ सय विरुवा रोप्ने योजना बनाएकोमा यस वर्ष १ सय ५० वटा रोपिएको जानकारी दिए । वृक्षारोपण कार्यक्रममा काभ्रे जेसिजका उपाध्यक्ष रसिक जोशी, बनेपा जुनियर जेसिजका अध्यक्ष सुष्टी श्रेष्ठ, उपभोक्ता समितीका अध्यक्ष अनिल थापा, सदस्य मन्दिप गिरी, लगायत सहभागि थिए ।