बेथानचोक । काभ्रेको बेथानचाेक गाउँपालिकाको अन्तिम नतिजा सार्वजनिक भएको छ । बेथानचोक गाउँपालिका प्रमुख र उपप्रमुखमा गठबन्धनका उम्मेद्वार विजयी भएका छन् ।

स्थानीय तहको निर्वाचन २०७९ बाट बेथानचोक गाउँपालिकाको अध्यक्षमा भगवान अधिकारी रुख चिन्हबाट विजयी भएका छन् । गाउँपालिका उपाध्यक्षमा हसिया हथौडाबाट तारा राना मगर विजयी भएकी छन् ।

नेपाली काँग्रेसका उम्मेदवार भगवान अधिकारीले ६ हजार १९ मत पाएर विजयी भए भने प्रत्याशी नेकपा एमालेका उम्मेदवार कमल प्रसाद तिमल्सिनाले ३ हजार १ सय ६० मत ल्याएका छन् ।

त्यसैगरी गाउँपालिका उपाध्यक्षमा नेकपा माओवादी केन्द्रका उम्मदेवार तारा राणा तिमल्सिनाले नकेपा एमालेका उम्मेदवार सरला लामिछाने केसीलाई ९ सय २५ मतले पछाडि पार्दै जित तय गरेकी हुन्। राणाले ४ हजार ४ सय ९८ र नेकपा एमाले उम्मेद्वार लामिछानेले ३ हजार ५ सय ७३ मत प्राप्त गरेका छन् ।

बेथानचोक गाउँपालिकाको वडा अध्यक्षमा वडा नं. ५ मा बाहेक वडाध्यक्षमा कांग्रेस प्रतिनिधिहरूले जित निकालेका छन् । वडा नं. ५ का उम्मेद्वार राजकुमार वाइबा स्वतन्त्रबाट पुतली चुनाव चिन्ह लिएर चुनावमा होमिएका थिए ।

अन्य निर्वाचित वडाध्यक्षहरूमा बेथानचोक गाउँपालिकामा वडा नं. १ मा मधुसुदन तिमल्सिना, वडा नं. २ मा पुरुषोत्तम तिमल्सिना, वडा नं. ३ मा कुबेर ढकाल, वडा नं. ४ मा कृष्ण बहादुर लामा, वडा नं. ५ मा राजकुमार वाईबा र वडा नं. ६ मा विष्णु तामाङ निर्वाचित भएका छन् ।